FACT CHECK: 2020 nang ihain ni Rep. Eric Yap ang panukalang palitan ang pangalan ng NAIA

Ang sabi-sabi: Umaksiyon na si dating ACT-CIS representative at ngayo’y Benguet Representative Eric Yap at nagpanukalang palitan ang pangalan ng Ninoy Aquino International Airport (NAIA). 

Nakalagay sa pamagat ng isang video na inilathala noong Enero 25: “KAKAPASOK LANG GRABE! PRES MARCOS BIGLAANG NILUSOB ang NAIA PAPALITAN na to MIA, YAP TULFO UMAKSYON”. Nakalagay din sa kahabaan ng video ang tekstong: “TULFO at ERIC YAP PANGALAN NG NAIA PALITAN NA!” (sic). 

Ipinarinig din sa video ang panayam ni Ben Tulfo kay Yap hinggil sa panukalang palitan ang pangalan ng paliparan. 

Marka: HINDI TOTOO

Bakit kailangang i-fact-check: Ang video na naglalaman ng sabi-sabi ay mayroong 204,000 view sa YouTube at laman ng ilan pang post sa Facebook. 

Ang katotohanan: Taong 2020 o noong nakaraang Kongreso pa nang mangyari ang ipinarinig na panayam ni Tulfo kay Yap hinggil sa panukalang batas ng kongresista na naglalayong palitan ang pangalan ng NAIA at gawing Paliparang Pandaigdig ng Pilipinas. Malayo ang nasabing pangalan sa MIA na nakalagay sa pamagat ng video. 

Hunyo 2020 nang ihain ni Yap kasama sina Davao City Representative Paolo Duterte at Marinduque Representative Lord Allan Jay Velasco ang nasabing panukala, ngunit naiwan itong nakabinbin sa committee level mula pa noong Hulyo ng kaparehong taon. 

Sa kasalukuyang Kongreso ay hindi hinain muli ng tatlong kongresista ang nasabing panukalang batas. – Ailla Dela Cruz/Rappler.com

Kung may nakikita kang kahina-hinalang Facebook pages, groups, accounts, websites, artikulo, o mga larawan sa iyong network, i-send ang mga ito sa factcheck@rappler.com. Maaari ring magsumite ng mga sabi-sabi sa #FactsFirstPH tipline. Ipadala lang ang mga ito bilang message sa Facebook ng Rappler, bilang direct message sa Twitter ng Newsbreak, o bilang message sa aming Viber fact check chatbot. Sa bawat fact check, labanan natin ang pagkalat ng mali o mapanlinlang na impormasyon.